Ешкім де, ешнәрсе де ұмытылмақ емес! Жер бетіндегі тіршілік атаулының бәрін жалмап, халықтың тыныш өмірін бұзып, ел басына қаһарлы күн тудырған соғыс талайды ажал құштырғаны белгілі. Майданға аттанып, мүгедек болып елге оралғандар да жетерлік. Отанын жаудан қорғаймын деп жүріп сондай жағдайға тап болғандардың бірі жерлесіміз Хайдар Абилдаев болатын. Ол 1909 жылы 23 тамызда қазіргі Тереңөзек кентінде дүниеге келіп, жастайынан балық шаруашылығымен айналысып, аймаққа сыйлы кісі болған. Өз ортасында абыройлы болған Хайдар атамыз 1939 жылы Отан алдындағы борышын өтемекке әскерге аттанады. "Атты әскерде" болып, қиын-қыстау заманда елін қорғайды. 1942 жылы соғысқа аттанып, сонау сұрапыл майдан жылдарындағы, жантүршігерлік жауыздықтарды көзімен көрген. Молотов қаласында жауға қарсы жан аямай шайқасқа түскен ол снарядтың астында қалып, басынан және оң қолынан жарақат алады. Соғысты әрі қарай жалғастыруға денсаулығы жарамаған Хайдар Әбілдаұлы 1943 жылы І топтағы мүгедек болып елге оралды. Отанға келген оған майданда жан аямай шайқасқаны үшін медаль табысталады. Денсаулығы айтарлықтай жақсы болмаса да өңірдегі балық шаруашылығын дамытуға үлес қосады. Көзі тірісінде 2 ұл, бес қызды тәрбиелеп өсірген Хайдар атамыз 1985 жылы 13 наурыз күні жетпіс алты жасқа қараған шағында дүниеден озды.